Golden Jubilee long Poland

Fr. AdrianAdamik  i raitim

Long tripela mun (Jun, Julai na Ogas) Arsbisop William Kurtz, SVD i bin stap long homliv na i bin visitim ol lain bilong religis orda bilong em (SVD) na bihain i bin go nastap liklik wantaim famili bilong em. Ol i amamas taim ol i bin lukim Arsbisop na ol i bin mekim bikpela selebresin bilong onarim Sakramen bilong Ordo Arsbisop i bin kisim 50-pela yia bipo.

Pastaim Arsbisop i bin go long taun Pieniezno (ples bilong ol SVD na seminari bilong ol long Poland). Long hap em i bin bungim 3-pela pater, ol i bin kisim Ordo wantaim em long de 28 bilong mun January 1962. Ol i bin selebreitim Golden Jubilee Misa wantaim ol narapela SVD pater na ol seminarian. Bihain Arsbisop i bin go long asples bilong em na long de 15 Julai 2012 em i bin mekim bikpela Misa long asples peris wantaim 4-pela bisop na planti pris na planti, planti bilipmanmeri na famili na pren bilong em. Bihain Misa ol i bin go long Peris Senta, bilong wanem? Ol  bilipmanmeri bilong peris i bin redim bikpela bung kaikai.

Arsbisop William i pulap pinis na ol i bin mekim naispela drama na singsing na ol i bin givim planti presen. Arsbisop na olgeta i amamas tru na ol i bin givim bikpela tenkyu long God Papa long 50-pela yia bilong Ordo: 20-pela yia olsem pris na 30-pela yia olsem bisop na bikpela tenkyu long 45-pela yia em i bin stap long Papua New Guinea. (Tanget Newsletter – 30 October 2012)

(CBC Communications 20121015 – giorgiolicini@yahoo.com)