Klia gut long nupela Buk Misa

Bisop Henk te Maarssen SVD i raitim
Retired Bisop bilong Kundiawa  

Nupela Buk Misa i bin kamap long Goroka long 20 Oktoba. Na long mun Novemba ol peris inap baim dispela nupela Buk Misa Long LCI, na ol pris bai inap yusim, stat long Namba Wan Sande bilong Atven, Disemba 2. Inap long tripela yia mipela i bin wok long redim dispela Nupela Buk Misa. Sampela hap tok i senis. Tasol i no planti, liklik tasol. I gutpela yumi save long ol dispela liklik senis na tu i gutpela, yumi klia gut bilong wanem ol dispela senis i bin kamap.

Yumi bin mekim Misa long Tok Pisin, stat long 1970. Bipo mipela i bin mekim Misa long Tok Latin tasol. Na stat long yia 1970 Pisin Translation Board i bin wok hat long tanim olgeta pre bilong Buk Misa long Tok Pisin. Dispela bikpela wok i pinis long 1984 tasol. Na ol i bin prinim Buk Misa yumi save yusim inap nau.

Long Katolik Sios nupela Tok Latin Buk Misa i bin kamap long yia 2002 na i gat sampela senis. Olsem na mipela i bin sekim gut olgeta pre bilong Pisin Buk Misa, bai mipela i tanim stret olgeta tok bilong dispela nupela Tok Latin Buk Misa.

Tripela tingting i stiaim dispela wok bilong tanim tok bilong Buk Misa.

Nambawan, mipela i mas tanim stret olgeta tok i stap long Tok Latin, no ken senisim nabaut.

Nambatu, planti tok bilong lotu i kam long Buk Baibel, olsem na mipela i mas bihainim pasin bilong toktok bilong Buk Baibel.

Na nambatri, lotu bilong Sios i no kamap nau tasol. Nogat. Em i bilong bipo tru, na i bilong olgeta hap, olsem na mipela i mas tingim tradisen bilong lotu bilong Sios na i no ken senisim long tingting na laik bilong mipela tasol.

I gat wanpela senis long bigin bilong Misa.

Pris i welkamim pipel na i tok:                        Lord i stap wantaim yupela.

Na inap nau ol manmeri i bin bekim: Na wantaim yu.

Tasol nau ol i mas tok:                           Na wantaim spirit bilong yu.  

Dispela ‘spirit bilong yu’ i tanim Tok Latin: ‘Et cum spiritu tuo.’

Dispela ‘Lord i stap wantaim yupela.’  i kam long Hetman 6,12, Rut 2,4, 2 Stori 15,2 na long Luk 1,28 Ensel ‘Gebriel i go long Maria na i tok olsem, ”Gude, meri. Bikpela i stap wantaim yu.’

Na bekim ‘Na wantaim spirit bilong yu.’ i kam long pinis bilong foapela pas bilong Santu Pol: 2 Timoti 4,22; Galesia 6,18, Filipai 4,23 na Filemon 25 ‘Marimari bilong Bikpela Jisas Krais i ken i stap wantaim spirit bilong yupela.’ (Filemon 25).

Bikpela senis i kamap long Gloria ‘Ona long God i stap antap’

Bipo ol i no bin tanim ‘Gloria’ gut long Tok Inglis na long Tok Pisin. Ol i bin sotim sampela tok, long wanem, ol i ting Tok Latin i mekim sampela hap tok tupela taim. Tasol nau mipela i tanim Tok Latin stret. Olsem na namba wan hap bilong dispela pre i senis olgeta na mipela bai tok:

‘Lord God, yu King bilong heven, yu Papa i strong olgeta. Mipela i tok amamas long yu. Mipela i adorim yu. Mipela i litimapim nem bilong yu. Mipela i tenkim yu long bikpela bilas bilong yu.’

Long Tok Bilip bilong Naisia i gat sampela senis tu. Na i gutpela ol manmeri i prektis pastaim.      

Long ‘Ol bratasusa, yupela pre,’ tu i gat senis. Bipo pris i bin tok long God ‘i ken laikim dispela ofa bilong yumi.’ Tasol nau bai em ii tok long  ‘ofa bilong mi na bilong yupela.’

Na ol manmeri i bekim:  Bikpela i ken kisim dispela ofa long han bilong yu bilong litimapim nem bilong em, na bilong helpim mipela na holi Sios bilong em.

Pris i tok: ‘Ofa bilong mi na bilong yupela,’ long wanem, Misa em wanpela ofa bilong Krais, Krais i givim long Papa bilong em long han bilong pris. (Long Misa pris i kisim ples bilong Krais, na tok, ‘bilong mi na bilong yupela.’) Na yumi ol bilipmanmeri wan wan tu i mas givim ofa bilong yumi wantaim dispela wanpela ofa bilong Krais, na yumi mas givim yumi yet long God, wankain olsem Jisas i bin givim em yet bilong kisim bek yumi.

Namba tu tok bipo long Prefasio tu i senis.                                     

Bipo pris i bin tok:                  Yupela tingting long God.

Na ol pipel i bin bekim:           Mipela i tingting long em.

Tasol nau pris bai tok:        ‘Litimapim hat bilong yupela.’

Na ol pipel i bekim:                 ‘Mipela i litimapim long Lord.’

Dispela ‘litimapim hat’ i tanim: ‘Sursum corda - Lift up your hearts’.

Bipo, long yia 1974, Pisin Translation Board i tingting planti, ol bai tanim “Sursum corda” olsem wanem. Ol pipel i save yusim tok ‘bel’ o ‘lewa’ bilong tanim tok ‘heart.’ Na Pisin Translation Board i no laikim dispela tok: ‘Litimapim ‘bel’ bilong yupela’ o ‘Litimapim ‘lewa’ bilong yupela.’ Olsem na ol i tingting i go, i go, na ol i tanim: ‘Yupela tingting long God.’ Dispela i no tanim ‘Sursum corda’ stret, tasol ol i pilim olsem, mining i klostu wankain. Tasol nau yumi save yusim dispela tok ‘hat - heart’ planti taim, olsem na mipela i bin tanim ‘Litimapim hat bilong yupela.’

Long konsekrasio i gat wanpela bikpela senis.

Bipo pris i bin tok: ‘Dispela blut bai i lus bilong tekewe sin bilong yupela na bilong olgeta manmeri.’  Nau pris bai i tok: ‘....na bilong planti manmeri.’

Dispela ‘planti’ i tanim Tok Latin ‘multis – many.’ Dispela i bihainim tok bilong Jisas yet. Em i bin tok: ’Dispela em i blut bilong mi bilong mekim kontrak. Mi kapsaitim bilong lusim sin bilong planti manmeri.’ (Mt 26, 28) Na ’Mi kapsaitim bilong helpim planti manmeri.’ (Mak 4, 24).

Dispela i bihainim tok bilong Aisaia: ‘Em i givim laip bilong em yet na karim hevi bilong sin bilong planti manmeri. (53,12).

Dispela tok ‘planti’ i bihainim pasin bilong toktok bilong ol Yuda, Jisas tu i bin yusim, na i gat mining: ‘bikpela lain’ ‘bikpela namba’. Na planti saveman bilong Baibel i tok, mining tru bilong dispela ‘planti’ em: ‘olgeta’, olgeta lain Israel na olgeta arapela lain manmeri wantaim.

Olsem na yumi no ken tingting planti na askim, ‘Ating Jisas i bin dai long sampela manmeri tasol, na long ol arapela nogat?’ Nogat tru. Jisas i bin dai bilong kisim bek olgeta manmeri. Tasol long lotu Sios i laik bihainim pasin bilong toktok bilong Jisas na bilong Baibel yet, olsem na pris i tok: “na long planti manmeri.”

Ating dispela sotpela toksave i kliaim sampela askim bilong ol manmeri na i ken helpim yumi long strongim pasin bilong lotu bilong yumi. Na wan wan peris i ken prektisim ol nupela bekim na pre pastaim, na Misa ii ken kamap moa gutpela. (CBC Communications 20121020 – giorgiolicini@yahoo.com)