MISIN SANDE – 2013 (POP FRANCIS)

Dia ol Brata na Susa,

Mipela i selebretim Misin Sande long taim Yia bilong Bilip i laik pinis. Em i taim bilong strongim laip na sindaun bilong mipela wantaim Bikpela na wokabaut bilong Sios i save strong long autim Gutnius.

1. Bilip em i presen bilong God. Em i opim tingting bilong mipela, bai mipela i ken save long God na laikim em. Em i laik serim laip bilong em wantaim mipela, bai mipela i ken stap moa gut na nais na i gat mining bilong em. God i laikim mipela! Tasol yumi mas akseptim bilip na bekim na trastim em na pilim laikpasin bilong em na tenkim em long bikpela marimari bilong em. God i no givim dispela presen long liklik lain tasol. Nogat. Olgeta inap long pilim amamas bilong God i laikim ol na laik sevim ol! Em i no presen yumi ken holimpas bilong yumi tasol. Yumi mas serim dispela presen. Sapos yumi laik holimpas bilip bilong mipela tasol, yumi kamap Kristen, laip bilong ol i no karim kaikai na ol i gat sik. Autim Gutnius em i wok bilong ol disaipel bilong Krais. Dispela pasin bilong ol disaipel i givim laip long Sios. “Kristen komyuniti i save mekim wok misin, em i gat mak bilong Kristen komyuniti i kamap bikpela pinis” (Benedikt 16). Kristen komyuniti       i kamap bikpela pinis, taim em i autim bilip bilong em, amamas long selebretim em long liturji, i gat laikpasin, em i autim Gutnius long narapela hap na go long longwe ples, moa yet long hap ol i no save yet long Krais. Mak bilong bilip i strong long yumi wan wan na long komyuniti em i olsem: yumi inap long serim bilip long narapela, mekim em i gro, ekspiriensim em long laikpasin, witnes long em long husat yumi bungim na i stap wantaim yumi
    
2. Long Yia bilong Bilip yumi tingim Vatikan Kaunsil 2 i bin kamap 50 yia i go pinis. Em i kirapim gen tingting bilong Sios em i stap namel long olgeta pipel na long olgeta kantri. Wok misin i no go long wanpela hap graun tasol, em i go long olgeta pipel na long olgeta kalsa na long wan wan man na meri, bikos bilip i no gat arere bilong em. Vatikan Kaunsil 2 i tokaut strong long bilip na wok misin bilong wan wan i kisim baptais pinis na bilong Kristen komyuniti bikos ol pipel bilong God i stap long komyuniti bilong daiosis na bilong peris na ol i mas witnes long Krais long olgeta pipel bilong olgeta hap bilong graun. Olsem na tok Jisas i bin givim long ol aposel i go long olgeta komyuniti tu: ol i mas “autim tok bilong mi long Jerusalen, na long olgeta hap bilong Judia, na long distrik Samaria, na i go inap long olgeta hap bilong graun” (Ap 1:8). Dispela em i nambawan wok bilong Kristen laip. Yumi mas wokabaut wantaim ol bratasusa, autim Gutnius na witnes long bilip long Krais na kamap aposel  bilong Gutnius. Mi invaitim olgeta bisop, ol pris, ol peris kaunsil, wan wan man na meri na wan wan grup bilong Sios long putim wok misin long program na pastoral plen bilong ol. Pastoral wok i no inap sapos em i no witnes long Krais long ol pipel. Wok misin i mas i stap long tingting bilong olgeta samting bilong Kristen laip.

3. Sampela taim i gat hevi long wok evanjelaisesen i no long ausait tasol, tasol insait long Kristen komyuniti tu. Ol i no amamas na ol i prêt long autim Gutnius bilong Krais long ol pipel na kam klostu long em. Sampela ol i ting, sapos ol i autim Gutnius, ol i no larim ol pipel i stap fri. Pop Pol 6 i tok olsem: I rong long mekim ol arapela i bilipim samting ol i no laik bilipim. I gutpela long rispektim fridom bilong ol na autim klia Tok Tru bilong Gutnius na salvesen bilong Jisas Krais. Yumi no ken prêt na yumi mas amamas long tokim ol long painim Jisas na kamap witnes bilong Gutnius. Jisas i kam bilong soim rot bilong salvesen long mipela na em i givim wok long mipela long soim dispela rot long ol arapela long olgeta hap bilong graun. Sios i mas autim na witnes long Gutnius i gutpela. No gat wanpela i ken autim Gutnius bilong Krais sapos em i no stap memba bilong Sios. Olgeta taim wok bilong autim Gutnius i mas kam long Sios. Sapos wanpela i autim, em i mekim long nem bilong Sios. Em i no wanpis, nogat, em i bilong Bodi bilong Krais na Holi Spirit i stiaim em.

4. Long taim nau i gat planti we bilong komunikesen namel long ol pipel. Ol i serim save na kain kain ekspiriens bilong ol. Planti ol pipel i go long narapela hap, ol turis na ol i painim wok. Em i no isi nau long peris long save, husat tru i bilong peris. Na long ol hap, bipo ol Kristen tasol i stap, planti lain bilong narapela hap i nogat bilip o bilong narapela lotu i kam i stap. Olsem na planti ol i baptais pinis i bihainim ol na lusim bilip bilong ol. “Nupela evanjelaisesen” i mas go long ol. Na tu, Gutnius bilong Jisas Krais i no bin kamap yet long planti ol pipel. I gat ol kain kain hevi tu long sait bilong moni na bisnis na kaikai na long ol samting bilong graun na long ol bikpela samting bilong laip. I gat planti pait long planti kantri na i no isi long painim rot bilong gutpela sindaun. Namel long ol dispela hevi i save kamap, yumi mas autim Gutnius yet na no ken prêt.Tok bilong God em i tok bilong hop na bilong kamap wanbel na em i tokim mipela, marimari na salvesen bilong God i stap klostu. Pawa bilong laikpasin bilong God inap winim olgeta tudak bilong sin na soim yumi gutpela rot. Krais tasol em i lait i soim rot. Ol i mas bungim Krais. Long testimoni bilong yumi wantaim laikpasin, yumi mas bringim hop i kam long bilip long dispela graun. Wok misin em i testimoni bilong laip i bringim hop na laikpasin. Sios em i no kampani i mekim wok marimari, o wanpela NGO. Sios em i komyuniti bilong ol pipel Holi Spirit i givim laip long ol. Ol i amamas ol i bin bungim Jisas Krais na ol i laik serim dispela amamas na salvesen Bikpela i bin givim long ol. Holi Spirit i stiaim Sios long dispela rot.
    
5. Mi laik invaitim olgeta long kamap misinari bilong Gutnius bilong Krais na mi tok tenkyu long olgeta misinari, long ol pris na relijes na ol lei misinari i bin harim singaut bilong Krais na lusim ples bilong ol bilong autim Gutnius long narapela kantri na kalsa. Dispela ol nupela Sios nau i salim ol misinari i kam long ol Sios i bin stap longpela taim na i gat hevi, na ol i bringim nupela laip na hop. Ol i bihainim tok bilong Jisas,  “Yupela i mas i go mekim olgeta lain manmeri i kamap disaipel bilong mi” (Matyu 28:19). I gutpela long  ol nupela Sios i salim ol misinari i go. Bai ol yet i no sot long ol wokmanmeri bilong Sios. Mi askim ol lain i harim singaut bilong God long tok yesa long Holi Spirit na no ken prêt long givim yu yet long God. Mi askim tu ol bisop na ol relijes, na ol kain kain Kristen komyuniti na grup long helpim ol Sios i nidim helpim, long kantri bilong ol yet o bilong narapela hap. Ol daiosis i gat moa vokesen i ken helpim ol i sot.

Mi askim ol misinari, moa yet ol fidei donum pris (ol pris i no bilong ol relijes) na ol lei misinari, long stap amamas long wok misin bilong ol na bringim amamas bilong ol gen bek long ples ol i kam long en. Ol i ken tingim Pol na Barnabas, taim ol i kam bek long nambawan wok misin bilong ol na ol i ripot, “Tupela i tokim ol long olgeta samting God i bin mekim long han bilong tupela…. God i bin opim rot long ol manmeri bilong ol arapela lain, na ol i bilip” (Aposel 14:27). Ol i ken strongim gen amamas na bilip bilong ol lain Kristen long ples .

Bisop bilong Rom wantaim olgeta bisop i wari long Sios bilong olgeta hap graun. Ol i sapotim wok bilong ol Pontifical Mission Societies. Dispela ol lain i wok long strongim tingting na laik bilong olgeta Kristen long mekim wok misin. Ol i tokaut tu, ol pipel bilong God i mas kisim moa save long wok misin na kirapim ol Kristen komyuniti long sapotim wok misin long kain kain we.

Mi tingim tu ol Kristen i stap long sampela kantri ol i no fri long bihainim lotu bilong ol  na ol gavman na ol arapela lotu i no rispektim ol. Ol i bratasusa bilong mipela, ol i strong long witnes – planti bilong ol i kamap martir - na ol arapela i laik bagarapim ol long kain kain hevi ol i givim long ol. Sampela ol i stap tru long bilip long Gutnius bilong Krais na ol i no prêt long indai long witnes long Krais. Mi laik toksave long ol dispela lain, ol famili na ol komyuniti i karim bikpela hevi, mi stap klostu long ol long pre bilong mi. Mi laik tokim ol tok bilong Jisas, “….bel bilong yupela i ken i stap strong. Mi winim pinis strong bilong dispela graun” (Jon 16:33).

Benedikt 16 i tok,  “Yupela mas pre long God i ken helpim mipela, na bai tok bilong Bikpela i ken ran i go long olgeta hap na kisim biknem wankain olsem em i bin kisim namel long yupela” (2 Tes 3:1).  Dispela Yia bilong Bilip i ken strongim bilip bilong yupela long Krais. Long Krais tasol laikpasin tru i ken i stap olgeta taim. Mi laik blesim olgeta misinari na olgeta i sapotim ol long autim Gutnius long olgeta hap bilong graun. Mipela tu bai i painim amamas long wok misin.

Vatikan, 19^th may 2013,  Pestode bilong Pentikos                                  

Francis