PAS BILONG POP FRANCIS LONG LEN 2015 “Bel biong yupela i mas i stap strong” (Jems 5:8)
Dia ol bratasusa,
Len em i taim bilong tanim bel bilong Sios, bilong wan wan komyuniti na bilong wan wan bilipmanmeri. Moa yet, em i taim bilong grasia (2 Kor 6:2)God i no askim samting em i no bin givim pastaim.“Yumi save laikim ol arapela, long wanem, God i bin laikim yumi pastaim“(1Jon 4:19). God i no stap longwe. Em i laikim mipela wan wan. Em i save long nem bilong mipela na em i wari long mipela sapos mipela i givim baksait long em. Em i tingim mipela na em i no lusim mipela nating. Pasin bilong yumi em i olsem: Taim yumi stap orait, yumi save lusim tingting long narapela. Yumi no save wari long hevi bilong narapela. Hart bilong mipela i kol tumas. (God Papa i no save mekim olsem.) Dispela mipasin i karamapim olgeta hap bilong graun. Mipela ol Kristen i mas winim dispela mipasin.
Sapos ol pipel bilong God i tanim bel na strongim laikpasin, ol inap long winim ol mipasin. Long dispela taim bilong Len mi laik toktok long dispela mipasin i no save wari long hevi bilong ol arapela.
No wari long God na long ol arapela, em i traim bilong mipela ol Kristen. Long taim bilong Len yumi mas harim singaut bilong ol profet na wari long hevi bilong ol pipel.
God i wari long olgeta hap bilong graun na laikim em. Em i givim Pikinini bilong em long sevim mipela. Em i kamap man, em i stap long graun, em i dai na kirap gen, olsem na em i opim dua namel long God na ol man. Sios i olsem han i holim dua i op, taim em i autim tok bilong God, em i selebretim ol sakramen, na em i witnes long bilip long olgeta wok narimari bilong em. (Gal 5:6) Tasol planti manmeri i save pasim dispela dua God i laik kam long en na ol i laik go long God. Olsem dispela han – em i Sios – i no ken wari sapos ol birua i bagarapim em.
Olsem na ol pipel bilong God i mas kamap nupela, nogut ol i tingim oltasol na i no wari long ol arapela. Baibel i ken skulim mipela long dispela tingting.
- “Sapos wanpela hap bodi i pilim pen, olgeta hap i save pilim pen wantaim” (1 Kor 12:26)
Sios
Laik bilong God tasol inap brukim dispela mipasin i no save wari long narapela. Sios i skulim mipela long laikpasin bilong God na em i witnes long em. Mipela inap long witnes sapos mipela yet i bin pilim laikpasin bilong God. Ol Kristen tasol, God i bin karamapim long gutpela pasin na long pasin marimari na long Krais yet, bai ol i kamap wokmanmeri bilong God na bilong ol arapela. Yumi lukim dispela pasin long lotu bilong Gutfonde taim ol i wasim lek bilong sampela. Pita i no bin laik long Jisas i wasim lek bilong em, tasol em i luksave olsem, Jisas i no laik skulim yumi tasol, yumi mas wasim lek bilong narapela olsem wanem. Ol lain tasol i larim Jisas long wasim lek bilong ol pastaim, ol tu bai inap wasim lek bilong narapela. Ol tasol i pas wantaim em na ol i ken helpim narapela. (Jon 13:8)
Len em i gutpela taim long larim Krais i helpim mipela, bai mipela i kamap olsem em yet. Dispela samting i kamap taim mipela i harim tok bilong God, kisim ol sakramen, moa yet long Yukaris. Long dispela yumi kamap olsem samting yumi kisim – em i bodi bilong Krais. Long dispela bodi i no gat spes bilong mipasin i save bagarapim mipela. Husat i bilong Krais, em i bilong wanpela bodi, na long dispela bodi yumi mas wari wanpela long narapela.“Sapos wanpela hap bodi i pilim pen, olgeta hap i save pilim pen wantaim” (1 Kor 12:26).
Sios em i komyuniti bilong ol santu i wanfamili tasol; i no bilong ol santu tasol, em i komyuniti bilong ol samting i santu tu: Laik bilong God i kamap ples klia long mipela long Krais na olgeta presen bilong em na long bekim bilong ol pipel i larim God i laikim ol. Ol i serim ol samting i holi wantaim ol arapela. Mipela i bung wantaim God, olsem na mipela inap long helpim ol lain i stap longwe. Wantaim ol mipela i askim God, bai mipela i op long plen bilong em long sevim mipela.
- “We stap Abel, brata bilong yu?” (Stat 4:9)
Ol peris na ol komyuniti
Samting mipela i toktok long en long sios, i fit tu long ol peris na long ol komyuniti. Ol i helpim mipela long save olsem, mipela i wanpela bodi tasol? Dispela bodi i save kisim na serim samting God i laik givim?Dispela bodi i save lukautim ol memba bilong em, moa yet ol memba i tarangu na i no gat strong na namba? O, mipela i tok long laikim olgeta manmeri, tasol mipela i no save lukim tarangu Lazarus i save sindaun long dua bilong mipela i pas pinis? (Luk 16: 19-31)
Lon g kisim samting God i laik givim mipela na em bai i karim kaikai , mipela i mas lukluk i go ausait long sios mipela i save lukim.
1. Long pre yumi mas bung wantaim sios i stap long heven. Pre bilong sios long graun i kamapim pasin bung wantaim long wok sevis na ol kain kain gutpela pasin na God i lukim. Wantaim ol santu i stap long heven yumi bung long daunim mipasin na kamapim laikpasin. Ol santu i amamas, bikos long dai na kirap bilong Jisas ol i bin win long mipasin, long bel nogut na long pasin bilong no laikim narapela. Ol santu i helpim mipela long kamapim laikpasin long olgeta hap. St. Therese bilong Lisieux i tok, amamas bilong ol santu i no pulap tru, sapos i gat man o meri long graun i karim pen. “Mi no laik stap nating long heven. Mi laik wok long helpim sios na olgeta manmeri.” (Pas 254, Julai 14, 1897)
Mipela i save serim amamas bilong ol santu, na ol i serim ol hevi bilong mipela, taim mipela i laik kamapim pasin bel isi na pasin sekan. Ol i amamas long win bilong Jisas i kirap pinis, na dispela i save givim stronglong mipela long daunim mipasin na bikhet pasin bilong mipela.
2.Wan wan komyuniti i mas go aut na joinim laip bilong sosaiti em i stap long en, moa yet ol tarangu na ol i stap longwe.Sios i gat wok misin. Sios i no bilong em tasol, em i mas go long olgeta kantri na pipel.
Long wok misin bilong em, sios i mas witnes long Jisas i laik bringim wan wan manmeri long Papa bilong em. Long wok misin bilong em, em i mas bringim laikpasin long olgeta manmeri, na em i no ken sarap. Sios i bihainim rot bilong Jisas Krais i go long olgeta man na meri inap long arere bilong graun. (Aposel 1:8) Wan wan man o meri, em i brata o susa, Krais i bin dai na kirap long en. Samting mipela i bin kisim, mipela i bin kisim bilong oltu. Tu, samting ol brata na susa i gat, em i presen biong sios na bilong olgeta manmeri.
Dia ol bratasusa, mi laikim tumas bai olgeta komyuniti na peris na olgeta ples sios i stap long en, ol i kamap ples bilong marimari namel long ol ples i pulap long mipasin.
- “Bel bilong yupela i mas i stap strong”. (Jems 5:8)
Wan wan Kristen manmeri
Mipasin i traim wan wan manmeri tu.Nius repot bilong planti trabel na hevi bilong ol pipel i karamapim mipela na mipela pilim, mipela i no inap long helpim ol. Bai mipela mekim wanem?
Nambawan samting, mipela i ken pre wantaim sios na wantaim ol santu long heven. Pre bilong planti pipel i bung i gat strong. Ol i statim wanpela muvmen, ol i kolim 24 aua bilong Lord, em bai i kamap long Mas 13 – 14, em i mak bilong dispela nid bilong pre. Mi hop bai sios olgeta na olgeta daiosis i bihainim dispela tupela de bilong pre.
Nambatu, mipela i ken mekim wok marimari long ol organaisesen bilong sios i save mekim wok marimari. Taim bilong Len i gutpela taim bilong soim laikpasin long ol arapela i nidim helpim. Yumi olgeta i wanpela family.
Namba tri, hevi na pen bilong narapela i singautim mipela long tanim bel. Nid bilong ol i soim mipela, mipela tu bai i nidim helpim bilong God na bilong ol brata na susa.Sapos yumi askim God wantaim daunpasin na tingim mipela yet i nogat strong, mipela bai trastim God i laikim mipela. Mipela bai inap long daunim traim bilong Satan i laik paulim mipela. Em i laik, bai mipela i ting, long strong bilong mipela tasol mipela inap long sevim olgeta manmeri na mipela yet.
Bilong daunim mipasin na ontop-pasin mi laik invaitim olgeta long bihainim tok bilong Benedikt 16. Em i tok, yumi mas skulim hart (bel) bilong mipela. (Deus Caritas Est, 31). Sapos yumi laik marimari, yumi mas i gat strongpela hart. Em i mas op long God na i no bihainim Satan. Em i mas larim Holi Spirit i senisim em, bai em i ken bringim laikpasin long ol bratasusa. Em i mas i gat hart i tarangu, i save, em yet i no gat strong, tasol em i givim em yet long ol arapela.
Ol bratasusa, long dispela taim bilong Len, yumi laik askim Bikpela, long mekim hart bilong mipela olsem hart bilong em. Bai yumi kisim hart i gat strong na em i save marimari, em i tingim hevi bilong narapela na helpim em, em i no pas na em i wari long hevi bilong narapela.
Mi pre na hop bai dispela Len i karim kaikai long olgeta bilipmanmeri na long olgeta Kristen komunity. Mi askim yupela olgeta long pre long helpim mi. God i ken blesim yupela na Santu Maria i ken lukautim yupela.
Vatican, Oktoba 4 1914
Pestode bilong Santu Francis bilong Assisi
Franciscus
—————