THE BUNDI CROSS – A CROSS CARRIER’S DIARY
(Having read the TIMES and/or WANTOK story Of the Bundi parishoners carrying a pilgrim cross for the 100+ klm last August you might like the angle of one of the actual carriers. Here is part of his thumbnail diary with some details the other accounts did not carry.
FRANK MIHALIC
Ogas 6: Mipela i wokabaut i go daun long maunten i kamap long Brahman. Kalap long trak na bateri i go long Sek.
Ogas 7: Pater Patik i blesim kruse. Mipela i kalap long tripela pela trak na ran i go long Madang, lukim bikpela haus lotu bilong bisop. Bihain mipela i bihainim Gogol Haiwe i go inap long Utu.
Ogas 8: Tripela meri na sampela boi i go pas, redim kem bilong mipela long Kepsarip. Pater Mlak wantaim ol boi I stat long karim kruse, wantaim olkain singsing lotu. Lo Wapsarip mipela i go insai long bikbus tru, na planti samting i paul nabaut. Mipela i lusim rot, mipela i bel hat, mipla i komplen, mipela i hangre nogut. Bihain tru tru mipela i long Wapsarip.
Ogas 9: Mipela i no mekim misa hia, em ples bilong ol Luteran. Mekim misa long bus. Wantaim moa ol kagoboi i go het, na pela man bilong karim kruse i kamap bihain. Tude mipela i painim rot nogut tru tru, i pas olgeta long draipela mambu. Na mipela i karim tripela busnaip tasol i kam. Wantaim moa bel bilong mipela i paia. Long belo bel bilong mipela i krai long hangre. Tasol ol kagoboi i stap longwe moa. Ol i wokim kem pinis na i wet i stap. Pater Mlak na mipela 10-pela i brukim bun long karim kruse. Tudak na mipela i no kamap long kem. Klosap mipela i pait namel long mipela nau. Ating mipela i mas slip long bus. Tasol mipela i lusim kruse i stap long bus, na mipela i wokabaut wantaim bumbum na kamap long kem.
Ogas 10: Long Misa Pater Joe (Maciolek) i givim gutpela toktok na i kolim bel bilong mipela gen. Tude mipela i kamap long Musak, na i slip gut.
Ogas 11: Nau mipela i wok long go daun long Ramu. Mipel laik slip long Banam I na II, tasol mipela i go na kamap long Sepu long apinun tru.
Ogas 12: Mipela i kalapim Ramu. Mipela man bilong bus i pret tru long sindaun long kanu. Mipela i bungim ol wantok namba wan taim long Daungal. Mipela islip hia.
Ogas 13: Mipela i kamap long kem bilong "Resources Exploration” long Kurumbukari. Pater Joe i kisim sik. Ol boi biong Dengekevi i pasim rot bai mipela i no ken goapim maunten tude yet.
(Date not clear) : Mipela i wok long goapim bikpela maunten Kabiani. Ol pipel bilong ples i helpim mipela. Rot i go antap stret olsem wanpela tri. Long 2 klok mipela i pinisim las bisket bilong mipela. Mekim, mekim. Nogat. Mipela i mas slip long bus. Mipela i harim krai bilong redio o lautspika bilong Pater Viktor long Bundi. Mipela i slip long as bilong diwai, no gat kaikai, kopi nating tasol. Nogat suga. Na i kol nogut tru.
Ogas 14: Long tulait mipela i karim kruse i go na sanapim antap long maunten. Nau mipela i lukluk i go bek long rot na long nambis. Ol Guiebi i bringim brekpas i kam long mipela. Orait, nau mipela i go daun long Guiebi na i givim kruse long han bilong ol brata. Mipela olgeta 64 boi i krai long karim kruse, long wanem, nau kruse i olsem brada bilong mipela. Pater Golly wantaim ol pipel i kisim kruse long han bilong ol na karim i go. Long nait Pater Mlak i baim wanpela pik na mipela i kaikai gutpela tru.
Ogas 15: Nau mipela ol manmeri bilong Bundi na Denglagu i go bek long ples. Mipela i gutbai long kruse. Insait long bel mipela wan wan i pilim narakain tru. Mipela i pilim wanpela senis i bin kamap insait long mipela. Em tasol.
Source: “Word PNG” Nr 66, January 1984
—————